لمحبى الفارما وعلاقة الفارما بما نراة فى الحقل الداجنى
وللناس اللى بلاحظ انك بيتفاعلو مع بوستات الفارما
هنتكلم عن حاجة علمية شوية بس الخلاصة للمربى العادى هتلاقيها فى اخر سطور
فية بروتين سكرى فى خلايا جسم الطير اسمة p-glycoprotein
بتلاقية زيادة فى القناة الهضمية
والكبد والكلية وبنسبة اقل فى المخ والاعضاء المناعية
اية فايدتة ؟
هى نقل الادوية او المواد الغريبة من داخل الخلية الى خارجها
وانا منزل صورة توضح طريقة النقل
من الملاحظ ان تمركزة فى ال3 اعضاء المسؤولين عن اخراج الدوا زى القناة الهضمية والكبد والكلية يدل على اهميتة فى فارما غالبية الادوية
مثلة مثل السيتوكروم p450 اللى كثير اتكلمنا عنة فى منشورات سابقة
انا عامل علية ملف ومجمع علية ابحاث كثير هقولكم على شوية ملاحظات عنة فى الاخر
لكن ما لفت انتباهى هو البحث الصينى المدرج فى البوست دا
الا وهو اضافات الكوكسيديا العلفية وتاثيرها على فارما الفلورافنيكول
البحث بيقول ان المصانع اللى بتركب علف ومحتوى على مضاد كوكسيديا فية اى من
سالينومايسين – مونانسين – ماديوراميسين
لما تيجى تعالج ب الفلورافينكول او ما يسموة المربين البانفلور ف فاعلية الدوا بتقل جدا
ودا بسبب تاثير ال3 مضادات كوكسيدية على البروتين السكرى p-glycoprotein المسؤول عن اطراح واتاحية الفلورافينكول
فبيقولك ان اضافات العلف المذكورة بتسرع امتصاص وتوزيع الفلورافنيكول وبالتالى سرعة اطراحة خارج الجسم بالتالى فاعلية اقل ومدة تعرض الميكروب لة اقل يعنى الدوا يدخل ويخرج من الجسم بسرعة من غير ما يلحق ياثر على المرض
طيب كدا خلصنا البحث
تعالى نفتح ملف الp-glycoprotein ونشوف لما ادوية بتاثر علية اية اللى بيضرنا فى المزرعة
لقيت ان اى دوا فى العلف او المية زى ال3 مضادات كوكسيديا المذكورين يقلل ايضا من
مفعول الارثرومايسين
و وعائلة الانروفلوكساسين
ومضاد الطفيليات الشهير الإيفيرمكتين
مش كدا وبس بل بياثر على مضاد الالتهاب الشهير البريدنيوزلون اللى بلاحظ ان منتجات كثير حاليا محتوية علية علشانة بيقوى عمل بعض المضادات
اذا لما تلاقى الادوية المذكورة مش جايبة نتيجة مع انك مشخص صح ومختار شركة ادوية صح هيكون الخلل من اضافات الاعلاف
تخيل حتى عائلة التتراسيكلين ايضا تتاثر باى حاجة تاثر على البروتين السكرى
p-glycoprotein
حيث بالبحث فى المصادر العلمية وجدت ان المادة الشهيرة اللى اسمها السليمارين اللى بتدخل فى غالبية منشطات الكبد ايضا لها تاثير على
الp-glycoprotein وهذا ادى الى تقليل فاعلية الدوكسى بسبب انة سرع من اخراجة
يعنى نقدر نقول ايضا ان مضادات الكوكسيديا ال3 العلفية دى بتقلل من فاعلية الدوكسى كما فعل السليمارين طالما انهم بياثرو على البروتين السكرى دا
على فكرة تاثير اضافات الكوكسيديا ملاحظ ايضا على سيتوكروم بى 450 وهو ايضا مسؤول عن اخراج الادوية من الجسم
طيب تعالى ننتقل الى تاثير بعض الامراض على كل من
سيتوكروم بى 450 و الp-glycoprotein
هنلاقى ان كل من الكوكسيديا وسموم الافلاتوكسين ايضا تاثر عليهم
عارف دا معناة اية؟
معناة ان لو فية عدوى مركبة من سموم او كوكسيديا مع اى مرض بكتيرى زى الميكوبلازما او السالمونيللا او الكولاى ومحتاج تحط اى من المضادات الحيوية السابقة ف تاثيرها ايضا هتقل
ف انا من وجة نظرى الشخصية والمبنية على تجارب حقلية
انك تعالج الكوكسيديا او السموم اولا وبعد انتهاء العلاج انزل بالمضاد الحيوى خوفا على فاعليتة
وفية بحث شهير عن تاثير الاصابة ب سموم الافلاتوكسين على فارما الانروفلوكساسين فتلاقى السموم اثرت على البروتين السكرى p بالتالى فاعلية الانرو اصبحت ضعيفة جدا
وحتى لا نطيل على حضراتكم
نختصر الكلام فى الاتى
لو علفك فية مضاد كوكسيديا من المذكورين اعلاة لا تعالج ب فلورفنيكول لو ارثرومايسين او عائلة الانرو
ثانيا لازم اصحاب تراكيب الاعلاف يعلم المربى او المشرف او المختص بنوعية مضاد الكوكسيديا لانة كدا بيساعدة ولا يعتبرها اسرار عسكرية
ثالثا ممنوع الجمع بين منشطات الكبد المحتوية على السلمارين والدوكسى او اى ادوية تتاثر ب p-glycoprotein
واخيرا عالج كوكسيديا او سموم اولا ثم بعد الشفاء عالج الميكوبلازما او الكولاى او السالمونيللا
طيب يا مهندس عاطف لو مجبر اشتغل بالادوية دى ومصانع الاعلاف مش عاوزة تقول على مضاد الكوكسيديا حضرتك بتتصرف فى الموقف دا ازاى
هقولك على تجربة حقلية وهنزلك اثباتها العلمى تحت
اولا لو مجبر تشتغل بالفلوافنيكول حط معاة بروبيوتيك
ف وجد ان البروبيوتيك يحجم شوية من تاثير الادوية على البروتين السكرى او السيتوكروم الكبدى وفية مفاجئات جديد بهذا الشأن
ولو حسيت ان الارثرومايسين والتيلوزين وعائلتهم مش جايبة نتيجة بسبب اضافات الاعلاف حط معاهم فيتامين ه وسلينيوم
اما باقى الادوية ف جارى البحث عن طريقة اصلاحها
البوست دا فعلا متعوب علية جدا على ما جمعنا الداتا دى علميا ب مواقفها الحقلية
فلا تحرمونا من المكفاءة وهى دعوة بظهر الغيب
هذا ما نعلمة والله تعالى اعلى واعلم
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
